U pieršym kvartale 2024 hoda kolkaść pracoŭnaj siły ŭ Biełarusi skłała 4,963 miljona čałaviek — heta źviestki Biełstata. Siarod ich kala 4,801 miljona — heta zaniatyja ŭ ekanomicy, jašče 161,9 tysiačy čałaviek — biespracoŭnyja.
Zhodna z padychodami Mižnarodnaj arhanizacyi pracy, da hetaj katehoryi adnosiacca pracazdolnyja ludzi starejšyja za 15 hadoŭ, u jakich niama pracy, ale jakija znachodziacca ŭ jaje aktyŭnym pošuku.
Astatniaje nasielnictva nie ŭvajšło ŭ pracoŭnuju siłu, heta značyć hetyja ludzi pa niejkaj pryčynie nie šukali pracu. U pieršym kvartale ŭ hetuju hrupu ŭvajšli 2,147 miljona čałaviek. Siarod ich nie žadali pracavać 1,908 miljona čałaviek, chacieli pracavać 239,3 tysiačy čałaviek.
Asnoŭnaja častka hetaj hrupy — piensijaniery, jakija nie chočuć pracavać. Takich ludziej u Biełarusi 1,336 miljona čałaviek.
Pry hetym pracazdolnych hramadzian, jakija nie ŭvachodziać u pracoŭnuju siłu, u krainie 679,5 tysiačy čałaviek. Siarod ich 488,1 tysiačy nie chacieli pracavać, a 191,4 tysiačy — chacieli, ale pa roznych pryčynach nie mahli prystupić da pracy.
Siarod tych, chto nie žadaje pracavać, 302,1 tysiačy — heta navučency na dzionnaj formie atrymańnia adukacyi. Jašče 41 tysiača čałaviek — heta piensijaniery pracazdolnaha ŭzrostu. Vychodzić, było jašče 145 tysiač čałaviek, jakija nie žadali pracavać i nie źjaŭlalisia ni studentami, ni piensijanierami.
Razam z tymi, chto chacieŭ pracavać, ale nie moh pačać, hetaja hrupa i składaje tak zvanuju bazu «darmajedaŭ». Vychodzić, u sumie ich 336,4 tysiačy čałaviek, abo 6,78% ad usioj kolkaści pracoŭnaj siły.
Nahadajem, što pavodle novych praviłaŭ baza «darmajedaŭ» u Biełarusi abnaŭlajecca kožny miesiac. U jaje ŭklučajuć u tym liku tych, chto pakinuŭ krainu bolš, čym na miesiac, a taksama pradprymalnikaŭ, jakija nie płaciać peŭnuju sumu padatkaŭ.
Biełarusy, jakija trapili ŭ bazu i źjaŭlajucca ŭłaśnikami žylla, vymušanyja apłačvać «kamunałku» pa maksimalnych taryfach.
Čytajcie taksama:
U Biełarusi mohuć viarnuć artykuł za darmajedstva
Jakija źmieny ŭ zakonie pa «darmajedach» čakajucca z 1 krasavika
Kolki płaciać za kamunałku «darmajedy»? Biełaruska šakavała žyroŭkaj za studzień
Ź lipienia IP zmohuć padavać u padatkovuju tolki elektronnuju dekłaracyju. Pasłuha nie biaspłatnaja
Samazaniatyja pačali atrymlivać listy pra zaličeńnie ŭ darmajedy. Jak takoje mahčyma?
